როგორ მუშაობს SEO სააგენტო

ბიზნესების უმეტესობა SEO სააგენტოს მაშინ ეძებს, როცა საიტი Google-ში საერთოდ არ ჩანს, პოზიციები დაეცა ან რეკლამის გარეშე მოთხოვნები თითქმის აღარ შემოდის. ამ დროს პირველი მოლოდინი ხშირად მარტივია: სააგენტომ რამდენიმე საკვანძო სიტყვა უნდა დაამატოს, ბექლინკები მოიპოვოს და საიტი პირველ ადგილზე გადაიყვანოს.

რეალური სამუშაო ასე პირდაპირ არ იწყება. ჯერ უნდა გაირკვეს, რა მდგომარეობაშია საიტი, რომელ გვერდებს აჩვენებს Google, რომელ საძიებო სიტყვებზე აქვს უკვე შედეგი და სად იკარგება ზრდის შესაძლებლობა. ზოგ საიტს ტექნიკური პრობლემა აქვს. სხვას კარგი გვერდები აქვს, მაგრამ ისინი ერთმანეთთან კონკურენციაში შედიან. არის შემთხვევებიც, როცა ბევრი სტატიაა გამოქვეყნებული, თუმცა მომხმარებლის რეალურ კითხვებს არცერთი სრულად არ პასუხობს.

სწორედ ამიტომ, კარგი SEO სააგენტოს მომსახურება თავიდანვე ერთნაირი გეგმით არ უნდა იწყებოდეს. სამუშაო უნდა მოერგოს საიტის ისტორიას, ბიზნესის სფეროს, კონკურენციასა და იმ მომსახურებას, რომლის გაყიდვაც კომპანიას რეალურად სურს.

მუშაობა იწყება არსებული მდგომარეობის სწორად შეფასებით

პირველი ეტაპის მიზანი არ არის მხოლოდ შეცდომების პოვნა. სააგენტომ უნდა დაინახოს სრული სურათი. მაგალითად, შეიძლება მთავარი გვერდი უკვე მეორე ან მესამე პოზიციაზე იყოს მნიშვნელოვანი საძიებო ფრაზისთვის. ასეთ შემთხვევაში მისი სრულად გადაწერა ზედმეტი რისკია. უკეთესი გადაწყვეტილება შეიძლება იყოს გვერდის არსებული ძალის შენარჩუნება, რამდენიმე სუსტი ნაწილის გაუმჯობესება და დამატებითი შიდა თუ გარე ბმულებით გაძლიერება.

სხვა შემთხვევაში ერთი და იგივე თემაზე შეიძლება სამი გვერდი არსებობდეს. თითოეულ მათგანზე წერია მსგავსი ტექსტი, გამოყენებულია მსგავსი სათაური და ყველა ერთსა და იმავე საკვანძო სიტყვაზე ცდილობს პოზიციის დაკავებას. Google-ს უჭირს გადაწყვიტოს, რომელი URL არის მთავარი. შედეგად არცერთი გვერდი არ იღებს იმ პოზიციას, რომლის მიღებაც ერთ კარგად გამართულ გვერდს შეეძლო.

ასეთი საკითხების დასადგენად ტარდება SEO აუდიტი. შემოწმებისას სააგენტო სწავლობს Google Search Console-ის მონაცემებს, ინდექსირებულ გვერდებს, საიტის სტრუქტურას, ტექნიკურ შეცდომებს, შიდა ბმულებს, კონტენტს, ბექლინკებსა და კონკურენტების მდგომარეობას.

აუდიტის დასრულების შემდეგ კლიენტმა უნდა მიიღოს არა რამდენიმე რთული ტერმინით სავსე დოკუმენტი, არამედ გასაგები სამუშაო გეგმა. მასში უნდა ჩანდეს, რა არის პრობლემა, რატომ არის მისი გამოსწორება საჭირო, რა უნდა გაკეთდეს პირველ რიგში და რომელ ცვლილებას შეიძლება ჰქონდეს ყველაზე დიდი გავლენა.

ტექნიკური ნაწილი და კონტენტი ცალ-ცალკე ვერ მუშაობს

ხშირად SEO მხოლოდ ტექსტების დაწერასთან ასოცირდება, თუმცა კარგი კონტენტი ვერ გამოიღებს სრულ შედეგს, თუ Google გვერდს სწორად ვერ ამუშავებს. საიტი შეიძლება ვიზუალურად გამართულად ჩანდეს, მაგრამ მნიშვნელოვანი გვერდი ინდექსში არ იყოს, რამდენიმე მისამართით იხსნებოდეს ან სხვა URL ჰქონდეს მითითებული მთავარ ვერსიად.

ტექნიკური SEO მოიცავს ინდექსაციის, Sitemap-ის, robots.txt ფაილის, canonical მისამართების, გადამისამართებების, 404 შეცდომების, მობილური ვერსიისა და ჩატვირთვის სიჩქარის შემოწმებას. ამავე ეტაპზე უნდა გაირკვეს, რამდენად მარტივად პოულობს Google მნიშვნელოვან გვერდებს და ხომ არ ხარჯავს დროს უსარგებლო ან დუბლირებულ URL-ებზე.

ტექნიკური ნაწილის გამართვის შემდეგ ყურადღება გადადის თავად გვერდებზე. თითოეულ მნიშვნელოვან URL-ს უნდა ჰქონდეს კონკრეტული დანიშნულება. მთავარი გვერდი შეიძლება მუშაობდეს სააგენტოს სახელთან დაკავშირებულ კომერციულ მოთხოვნებზე, მომსახურების გვერდი კონკრეტულ სერვისზე, ფასის გვერდი ღირებულებით დაინტერესებულ მომხმარებელზე, ხოლო ბლოგი ინფორმაციულ კითხვებზე.

ეს განაწილება საჭიროა იმისთვის, რომ საიტის სხვადასხვა გვერდმა ერთმანეთი გააძლიეროს და არა დაასუსტოს. თემების სწორად დაგეგმვის შესახებ მეტი ინფორმაცია მოცემულია SEO ოპტიმიზაციის სრულ გზამკვლევში.

კონტენტი უნდა პასუხობდეს რეალურ კითხვას

ბლოგის გამოქვეყნება მხოლოდ იმიტომ, რომ საიტზე ახალი ტექსტი დაემატოს, საკმარისი არ არის. ჯერ უნდა ვიცოდეთ, რას ეძებს ადამიანი და რა პასუხის მიღება სურს.

მომხმარებელი, რომელიც წერს „რა არის SEO“, ინფორმაციის მოძიების ეტაპზეა. ადამიანი, რომელიც ეძებს „SEO სააგენტოს“, უკვე მომსახურების მიმწოდებლებს ადარებს. ხოლო ფრაზა „SEO სააგენტოს ფასი“ მიანიშნებს, რომ მომხმარებელს სამუშაოს მოცულობისა და ღირებულების გაგება სურს.

ამ მოთხოვნებისთვის ერთი და იგივე ტექსტის გამოყენება არასწორია. ინფორმაციული სტატია დეტალურად უნდა ხსნიდეს თემას და მკითხველს დაკავშირებულ გვერდებზე გადასვლის შესაძლებლობას აძლევდეს. კომერციულ გვერდზე კი სწრაფად უნდა ჩანდეს, რას აკეთებს კომპანია, როგორ მუშაობს, რა გამოცდილება აქვს და როგორ შეიძლება მასთან დაკავშირება.

ძლიერი კონტენტი მხოლოდ ზოგად განმარტებებს არ იმეორებს. მასში სასურველია ჩანდეს რეალური გამოცდილება, გავრცელებული პრობლემები, კონკრეტული მაგალითები და ის გადაწყვეტილებები, რომლებიც პრაქტიკაში მუშაობს. როდესაც სააგენტო ამბობს, რომ შედეგი მიიღო, ამას მონაცემებიც უნდა ადასტურებდეს. ასეთი მასალის მაგალითია SEO ოპტიმიზაციის შედეგების ქეისი, სადაც ჩანს საწყისი მდგომარეობა, შესრულებული სამუშაო და ცვლილების ეტაპები.

კონტენტის შექმნა მხოლოდ ბლოგებს არ მოიცავს. სააგენტო ასევე მუშაობს სერვისის გვერდებზე, კატეგორიებზე, პროდუქტის ტექსტებზე, ხშირად დასმულ კითხვებზე, ადგილობრივ გვერდებზე, ქეისებსა და ძველი მასალების განახლებაზე. სამუშაოს სრული მოცულობა დამოკიდებულია საიტის ტიპზე და ბიზნესის მიზანზე. დეტალური მიმართულებები შეგიძლია ნახო SEO მომსახურების გვერდზე.

ბექლინკების რაოდენობა ყველაფერს არ წყვეტს

სხვა ვებსაიტებიდან მიღებული ბმულები SEO-ს მნიშვნელოვანი ნაწილია, თუმცა მხოლოდ საერთო რაოდენობის ნახვა ხშირად შეცდომაში შეგვიყვანს. ერთ საიტს შეიძლება ათასობით ბექლინკი ჰქონდეს, მაგრამ მათი დიდი ნაწილი რამდენიმე დომენიდან მოდიოდეს. მეორე საიტს ნაკლები ბმული ჰქონდეს, თუმცა ისინი სხვადასხვა ავტორიტეტული და თემატურად შესაბამისი წყაროდან იყოს მიღებული.

სააგენტომ უნდა შეაფასოს, საიდან მოდის ბმული, რა თემაზეა გვერდი, რომელ URL-ზე გადადის, რა ტექსტია გამოყენებული და რამდენად ბუნებრივად არის ჩასმული კონტექსტში. კლიენტის საიტის ყველა გვერდის ქვედა ნაწილში ავტომატურად განთავსებული ბმული და ბიზნესმედიაში გამოქვეყნებული თემატური სტატიის ბმული ერთნაირი ღირებულების ვერ იქნება.

მნიშვნელოვანია ბმულების სწორად გადანაწილებაც. თუ ყველა წყარო მხოლოდ მთავარ გვერდზე მიუთითებს, ცალკეული სერვისის ან მნიშვნელოვანი სტატიის გაძლიერება რთულდება. ბუნებრივ პროფილში ნაწილი ბრენდზე გადადის, ნაწილი სერვისებზე, ნაწილი ქეისებზე, ხოლო ანქორის ტექსტებიც ერთმანეთისგან განსხვავდება.

სააგენტომ კლიენტს უნდა აუხსნას, სად განთავსდა ბმული და რატომ შეირჩა კონკრეტული საიტი. მხოლოდ რაოდენობის გაზრდის მიზნით შემთხვევითი დირექტორიებისა და არასანდო გვერდების გამოყენება გრძელვადიანი სტრატეგია არ არის.

რას უნდა ხედავდეს კლიენტი ყოველთვიურ ანგარიშში

SEO ერთჯერადი სამუშაო არ არის. ტექნიკური პრობლემების გამოსწორების შემდეგ საჭიროა დაკვირვება, როგორ რეაგირებს Google ცვლილებებზე, რომელი გვერდები იზრდება და სად გაჩნდა ახალი შესაძლებლობა.

ყოველთვიურ ანგარიშში მხოლოდ შესრულებული დავალებების ჩამონათვალი არ უნდა იყოს. კლიენტმა უნდა დაინახოს, როგორ შეიცვალა ორგანული კლიკები, ჩვენებები, პოზიციები, CTR, სამიზნე გვერდების ტრაფიკი და მიღებული მოთხოვნები. თუ შესაძლებელია, SEO მონაცემები უნდა დაუკავშირდეს ზარებს, ფორმებს, შეკვეთებს ან გაყიდვებს.

ანგარიშმა ასევე უნდა ახსნას, რატომ შესრულდა კონკრეტული სამუშაო. მაგალითად, რატომ გაერთიანდა ორი გვერდი, რატომ შეიცვალა შიდა ბმული, რატომ განახლდა სტატია ან რატომ გადაწყდა ახალი კონტენტის შექმნა. ეს კლიენტს ეხმარება დაინახოს, რომ სამუშაო შემთხვევითი დავალებებისგან არ შედგება.

თუ პოზიციები გაიზარდა, მაგრამ მომხმარებლები შედეგზე არ აკლიკებენ, შეიძლება სათაურის ან აღწერის გაუმჯობესება გახდეს საჭირო. თუ ტრაფიკი მოდის, მაგრამ მოთხოვნები არ იზრდება, პრობლემა შეიძლება შეთავაზებაში, გვერდის სტრუქტურაში, ფასის კომუნიკაციაში ან საკონტაქტო ფორმაში იყოს. SEO სააგენტოს სამუშაო მხოლოდ ტრაფიკის მოყვანით არ სრულდება.

რამდენი დრო სჭირდება შედეგს და როგორ შევარჩიოთ სააგენტო

SEO-სთვის ერთი ფიქსირებული ვადა არ არსებობს. ცვლილების სიჩქარეზე მოქმედებს საიტის ისტორია, არსებული პოზიციები, კონკურენცია, ტექნიკური მდგომარეობა, კონტენტის ხარისხი და ბექლინკების პროფილი. მცირე ტექნიკური პრობლემის გამოსწორების ეფექტი შეიძლება შედარებით სწრაფად გამოჩნდეს, ხოლო კონკურენტულ მოთხოვნაზე სტაბილური ზრდა მეტ დროს მოითხოვდეს.

სანდო სააგენტო კონკრეტულ საძიებო სიტყვაზე პირველი ადგილის გარანტიას არ მოგცემს. მას შეუძლია აგიხსნას, რა მდგომარეობაშია საიტი, რა სამუშაოებია დაგეგმილი, როგორ შეფასდება შედეგი და რა რისკები არსებობს. საბოლოო პოზიციაზე სააგენტოს გარდა კონკურენტების მოქმედება და Google-ის სისტემებიც ახდენს გავლენას.

სააგენტოს არჩევისას მხოლოდ პრეზენტაციასა და დაპირებებს ნუ დაეყრდნობი. ჰკითხე, ვინ იმუშავებს პროექტზე, როგორ იწყებენ აუდიტს, როგორ არჩევენ საკვანძო სიტყვებს, სად იღებენ ბექლინკებს და რას მიიღებ ყოველთვიურ ანგარიშში. ასევე მოითხოვე რეალური ქეისები და დააკვირდი, ჩანს თუ არა მათში კონკრეტული მონაცემები.

ზოგ პროექტს შეიძლება ერთი სპეციალისტიც გაუმკლავდეს. მაგალითად, თუ მხოლოდ ტექნიკური შემოწმება ან ერთი გვერდის ოპტიმიზაცია გჭირდება. სააგენტო უფრო გამოსადეგია მაშინ, როცა პროცესში ერთდროულად საჭიროა SEO სპეციალისტი, პროგრამისტი, კონტენტის ავტორი, ანალიტიკოსი და გარე ბმულებზე პასუხისმგებელი ადამიანი. ამ ორი ფორმატის განსხვავება უფრო სრულად განხილულია სტატიაში SEO სააგენტო თუ ფრილანსერი.

ფასიც სამუშაოს მოცულობით უნდა განისაზღვროს. მცირე კორპორაციული საიტი, მრავალენოვანი პლატფორმა და დიდი ონლაინ მაღაზია ერთნაირ რესურსს ვერ მოითხოვს. ღირებულებაზე გავლენას ახდენს გვერდების რაოდენობა, კონკურენცია, კონტენტის საჭიროება, ტექნიკური ცვლილებები და გარე ოპტიმიზაციის მოცულობა. დამატებითი ინფორმაცია ხელმისაწვდომია SEO სააგენტოს ფასების გვერდზე.

ხშირად დასმული კითხვები